कमला भण्डारी ढकाल
आमा के ल्याइदिउ ?
घर आउने समयमा परदेशबाट फोन गरेर छोराले सोध्यो। राम्रो सङ्ग आउ बाबु तिमी आए पुग्छ आमाले भनिन् ।
भन्नु न भन्नु केही त भन्नु छोराले कर गर्यो ! त्यसो भए एउटा तातो कपडा ल्याइदेउ बाबु ।
छोराले मार्केट गएर एउटा महँगो कपडा किन्यो।
आमाको मनले खुशी मान्यो आँखाले बाटोमा नजर बिच्छ्याए । केही दिनमा छोरो आयो, घर उज्यालो भयो । छोराले खुशी हुँदै आमाको हातमा तातो कपडा राखिदिदै भन्यो आमा महँगो हो जतन गरेर लगाउनु है । आमाले खोलेर हेरिन, तल देखि माथि सम्म नजर डुलाइन् र मनमनै सोचिन !
बिहानै उठ्नु घर धन्दा अनि गाईबस्तुको काम सक्नु घाँस काट्न जानु आउनु खाना बनाउनु खानु जुठोभाडो गर्नु, दिउँसो खेतबारी जानु खनि खोस्री गर्नु, साँझ उस्तै काम यो तातो कपडो कति बेला लगाउनु फेरि ! कुटानी पिसानी गर्न जाँदा यो लगाएर बोरा बोक्नु धुलाम्ये बनाउनु अँह मिल्दैन न पछ्यौरा हुन्छ न स्विटर !
अन्त्यमा सोधिन् – बाबु यसको नाम के हो ?
छोराले भन्यो – कोट आमा विदेशीहरुले यस्तै लगाउछन् ।
पुष माघको ठिहिमा चिसो छेक्ने न्यानो बनाउने कपडा होइनरछ यो बरु साटेर चोलो किन्न मिल्दैन छोरा ?
