“कमल फूल”

घनश्याम रेग्मी

म फूल हुँ
कमल फूल
मेरो इतिहास खोज्छौ ?
कहाँ जन्मेँ
र कहाँ हुर्केँ ?
नसोध मलाई
वर्तमान हेर
दुर्गन्ध सहेर
फैलाउन सक्छु
सुगन्ध
विगत भुलेर
म रमाउन सक्छु
के तिमी
भुल्न सक्छौ
आफ्नो विगत ?
खराबका बिचमा
एउटा असल परिचयमा
उभ्याउन सक्छौ ?
सक्छौ भने
उभ्याएर हेर
मजस्तै
कमल फूल बनेर

अहिले
रङ्को लालित्य
जवानी
मादकता
खोज्न सक्छौ तिमी
मभित्र
किनकि
म फुलेको छु
आफ्नो
अथाह सङ्घर्ष
र मिहिनेतले
किनकि
म एउटा
कमल फूल हुँ

तिमी पनि
आफूभित्र
परिश्रमको
परीक्षा गर्न सक्छौ
हिलोमा
मजस्तै फुलेर
भित्र जे सुकै होस्
बाहिर हाँस्न सक्छौ
अरूको सन्तुष्टिमा
तिमी आफूलाई
समर्पण गर्न सक्छौ
विगत
अर्कै थियो
जगत् अर्कै छ
फगत देख्नेहरू
सुन्दरता हेर्छन्
सतही आँखाले
कामुक भावका
गिद्धे नजर
लगाउन सक्छन्
वास्तविकता
कसले खोज्छ र?
सङ्घर्ष
कसले हेर्छ र ?
कामुक भमरो
रसमात्र खोज्छ
विपत्तिको हात्ती
लुँड्याउन खोज्छ
म किञ्चित आत्तिन्न
ए, मान्छे हो!
तिमीहरू पाठ सिक
मबाट
र जीवनजगत्
सधैँ सुन्दर बनाउन
कसैको हानी
नगरीकन
आफ्नो पैतालामा
आफैँ उभिएर
हेर त
यो संसार
कति सुरम्य छ
एउटा फूल
मेरो आँखामा
फूल संसार हो
मलाई नबुझ्नेहरू
संसार काँडा देख्छन्
तसर्थ
ए, मानिसहरू हो!
आऊ
आफ्नो क्षेत्रबाट
उज्यालो
आँखा खोल
र चिहाऊ
यो संसार
म
कमल फूलले जस्तै ।।