“खै बुझेको कुरो”

गणेश दवाडी
लेटाङ -९मोरङ

हतोत्साहित गर्न हुन्न छात्र छात्रालाई
उत्साहित पार्नुपर्छ मात्र यिनलाई।

सिकाइमा प्रेरणा नै उत्तम हुन्छ साथी
हप्काउने दप्काउने हुन्छ त्यो नजाती
हरपल माथि राख्नुपर्छ छात्र छात्रालाई
सादर अनुरोध मेरो सबै मित्रलाई।

अबोध ती बच्चालाई कडा शासन भित्र
राख्दा बिद्रोही पो बन्छन् खै बुझेको मित्र
हौसला त छँदै छैन हुन् यी साथीभाइ
खै बुझेको कुरो हजुर कस्तो हो ठम्याइ।

निराश हुन्छन् बच्चा बच्ची खाली हकारेर
वृद्धि विकास सुस्त पार्नु हुन्न झपारेर
सिकाइको सिद्धान्तका आधार समाई
उत्प्रेरित पारौँ बच्चा सिकुन् खुब रमाई।

अन्तर निहित प्रतिभाको पहिचान गरी
नयाँ नौला बिउ बिजन मेहनतले छरी
कक्षाकोठा उर्वर होऊन् हेरौँ बाली झुलाई
चेहरामा मुस्कान छरौँ सुन्दर फूल फुलाई।