“घोडेजात्रा”

” केटाकेटीले कहाँ यस्तो गेडागुडी चिउरासँग चपाउँछन् र आमा ,व्यर्थको दु: ख गर्नुभएको ? मैले उनीहरूका लागि मम मगाइसकेँ ।” गाउँबाट भर्खर भर्खरै आएकी चम्पालाई बुहारीले खिन्न बनाई ।

” तर बुहारी , घोडेजात्राको दिनमा चिउरासँग भटमास र हरियो लसुनको अचार खाने चलन छ नि त । आज एकदिन यही खान्छन् नि, हुँदैन ?”

सासूले यति भन्नासाथ बुहारीले झिँजो मान्दै भनी , ” यस्ता खानेकुरा केटाकेटीले चपाउन सक्नुपर्‍यो नि ।”

अघिदेखि नै आमा र हजुरआमाको गल्फती सुनिरहेकी सानी नातिनी आएर मुस्कुराउँदै भनी,” ममी ! आज यही अचार र चिउरा खाऔँ न त । हजुरआमा नि खुसी हुने , हाम्रो सामाजिक किताबमा भनेझैं परम्परा पनि जोगिने ! “

बूढानीलकण्ठ , काठमाडौँ