“तिहार”

गंगा खड्का
बूढानीलकण्ठ ,काठमाडौँ

पाँचै दिन पाँचै थरी बोकीकन महिमा
तिहारको रमाइलोले बढाएर गरिमा
काग पनि पुजिने मीठो खान पाएर
कुकुर पनि फुरुङ्ग राम्रो माला लाएर ।

गाई गोरुलाई पूजा गर्ने कति राम्रो रीत
देउसे भैलो खेल्छन् जोडी मन चित्त
सेलरोटीको बास्ना चल्छ सबैतिर हरर
ठाउँठाउँमा चचहुइ गर्दै पिङमा सरर ।

चङ्गा उडाई आकाशमा पर्छन् खुब दङ्ग
धर्ती माता खुसी भई फेर्छिन् रुपरङ्ग
सयपत्री ,मखमली ,गोदावरी फूल
फुटाउँछन् लोभलाग्दो सौन्दर्यको मूल ।

दाजुभाइको निधारमा सप्तरङ्गी टीका
सम्बन्ध कहिले पनि नहोस् भन्दै फिक्का
दीर्घायुको कामना दिदीबहिनीले गर्छन्
यमराजको प्रवेश हुने दैलो तेलले घेर्छन् ।

कोसेली र उपहार पाएपछि रमाउँछन्
दिदीबहिनी नि खुसी भई दक्षिणा समाउँछन्
रातमा पनि झिलिमिली आहा! कति राम्रो
चाडपर्व सद्भावले मनाउनु छ हाम्रो।