परीक्षण

टीकाराम जोशी
इमाडोल

“सर ! बिन्ती छ। यसपटकलाई पास गरिदिनुहोला। अर्को साल म मिहिनेत गर्छु। ” छट्टुलालले सबैले सुन्ने गरी पढे र भने ,”कसो धम्की दिएनछ।” हलमा हाँसोको मूल फुट्यो।
“पढाईमा निरन्तर ध्यान दिनुपर्छ भन्दा कानमा तेल हाली बस्ने तर परीक्षाको मुखैमा किताब खोज्नेको हाल यस्तै हुन्छ।” शामलालले भने।
“मैले जाँचेको कापीमा त एउटाले हजारको नोट राखेर बिन्ती गरेको थियो।” रामलालले भने।
“तपाईँको त पैसावाला परेछ। अनि के गर्नुभयो तपाईँले ? मुचुल्का लेख्यो भने पनिकाले परीक्षार्थीलाई कारवाई थाल्छ। आफु जोगिनु पर्छ है सर । हुन त परीक्षण र परीक्षक गोप्य नै राखिन्छ।” छट्टुलालले आफुले जाँचिसकेका कापी पोको पार्दै भने।
“अयोग्यलाई योग्य भन्नु भनेको इमान बेच्नु होइन र। यस्ताहरुबाट देशको भविष्य राम्रो होला र ? ” रामलालले गम्भीर हुँदै भने।
यतिकैमा सडकमा होहल्ला सुनियो। “निर्वाचनको मुखैमा यस्ता लक्षण देखिन थाले। भोटका लागि जनतालाई बिन्तीभाउ र आश्वासन। फेरि नोट वितरण, बुथ क्याप्चरिङ नहोला भनेर भन्नसकिन्न।” शामलालले भने।
“राजनीतिमा साम,दाम,दण्ड र भेद जस्ता चिन्तनले जरा गाडेको हुनाले हो सर।” छट्टुलालले भने। “त्यसो भए उमेदवारको ज्ञान, बुद्धी, साहस र न्यायको प्रयोग गर्ने क्षमतालाई कसी बनाउनुपर्छ।” रामलालले भने।