फेसबुके औषधि

दुर्गा घिमिरे

बारीको छेउमा गाँजाको एउटा बोट थियो। एक दिन हरिमानले फेसबुकमा कसैले लेखेको देखे— “गाँजाको पात औषधि हो, खाएपछि धेरै रोग निको हुन्छ।” डाक्टरको सल्लाह नलिई उनले त्यसैलाई सत्य ठाने। भोलिपल्ट बिहानै बारीमा गएर गाँजाको केही पात टिपे र चपाए। केही बेरमै उनको टाउको घुम्न थाल्यो। आँखा रातो भए। शरीर असामान्य लाग्न थाल्यो। “लौ, खोलाको भूतले समात्यो कि क्या हो!” श्रीमती आत्तिँदै कराइन्। घरमा धामीझाँक्री बोलाइयो। झारफुक गरियो। तर हरिमानको अवस्था झन् बिग्रँदै गयो। अन्ततः उनलाई अस्पताल लगियो। जाँचपछि डाक्टरले सोधे, “आज केही असामान्य कुरा खानुभएको थियो?” हरिमान केहीबेर सोचेर बोले, “बिहान फेसबुकमा देखेको भरमा औषधि सम्झेर गाँजाको पात खाएको थिएँ, डाक्टर साब।” डाक्टर मुस्कुराए, “फेसबुक डाक्टर होइन। कुनै पनि जडीबुटी वा औषधि प्रयोग गर्नुअघि विशेषज्ञको सल्लाह आवश्यक हुन्छ।” हरिमान लज्जित भए। अस्पतालबाट घर फर्कँदै उनले मनमनै सङ्कल्प गरे, “अबदेखि फेसबुकको भरमा औषधि होइन, डाक्टरको सल्लाहको भरमा मात्र उपचार गर्नेछु।” सामाजिक सञ्जालमा देखिएका सबै स्वास्थ्य सल्लाह सही हुँदैनन्। जाँच र विशेषज्ञको परामर्शबिनाको उपचार जोखिमपूर्ण हुन सक्छ।