“बैशाख”

गणेश आत्रेय
मदनपोखरा,पाल्पा

बैशाख आए नव लाग्छ साल।
आनन्दको मौसम हालचाल॥
नाच्छन् खुशीले सब जीवजन्तु।
हाँस्छन् बगैँचा वन वृक्ष-तन्तु॥

बाला युवामा शिशु प्रौढतामा।
हुन्छन् खुशी ती हर नव्यतामा॥
रम्छन् सबै ती शुभ-सभ्यतामा।
हाँस्छन् र खेल्छन् नव भव्यतामा॥

बूढो भने आयु झनै घटाई।
बेकारका ती रटना रटाई॥
वैचित्र्यमा चिन्तन यो खटाई।
बैशाखले वृद्ध गर्यो झटाइ॥

बैशाख पल्टाउँछ हेर पातो।
थर्काउँदै हर्दछ खूब सातो॥
बूढो पुरानोपन देख्न हुन्न।
झस्काउँदै दिन्न बहार बुन्न॥

जे जे हुने हो हुनुपर्छ हुन्छ।
निश्चिन्तनाले मनभित्र गुन्छ॥
संसार यो काल-अधीन चल्छ।
बेला बितेसी मन व्यर्थ खल्छ॥

बैशाख नौलाकन खूब प्यारो।
पाक्छन् युवाका मनभित्र पारो॥
जहाँ छ जस्तो रित चल्छ सारो।
बैशाख बूढाकन हुन्छ गाह्रो॥