“मेरो देश”

नरिश्वर गौतम

फागुन लाग्यो पुस गयो
माघ पनि गयो
सिर्रसिर्र हावा चल्यो
फेरि चिसो भयो
हिजोअस्ति दुईचार दिन त
राम्रै घाम लायो
आज फेरि आकाशमा
कालो बादल छायो ।।
पश्चिमबाट चिसो हावा
पूर्व सर्दै छ रे
उत्तरतिर हिमालमा
हिउँ पर्दै छ रे
आकाशबाट फुर्रफुर्र
कपास झर्दै छ रे
किसानको मुहारमा
खुशी छर्दै छ रे ।।
बादल कालो भएपनि
झार्छ सेतो हिउँ
दुख अभाव भए पनि
यही देशमा जिउँ
प्रकृतिको बगैँचामा
खेल्दै मजा लिउँ
जेजे फल्छ यहाँ खाउँ
यहीँको पानी पिउँ ।।
संसारको सुन्दर शान्त
पवित्र यो देश
पराइको धनभन्दा
आफ्नै माटो बेस
आफ्नै संस्कार संस्कृति
प्यारो भाषावेश
यही माटोलाई माया गरौँ
नजाऊँ परदेश ।।