मणिराज भट्टराई
गठ्ठाघर ,भक्तपुर
सुत्छु प्यारी आमासँग उठ्ता सँगै हुन्छु
नित्य कर्म गरी कन हात मुख धुन्छु
हिजो पढेको पाठ दोहोर्याएर पढ्छु
आजको पाठ एक फेर सरसर्ती पढ्छु।
घरको काममा आमालाई सघाँउछु
भ्याए सम्म बा बा लाई पनि सघाउँछु
आमाको हातको खाना मीठो मानि खान्छु
सफा सुग्घर भएर स्कूल आँफै जान्छु।
साथी सँग मिलिजुली मिल्ने खेल खेल्छु
दुःख दिन्न कसैलाई बरु आँफै झेल्छु
रिसाउन्न कैले पनि हाँसेर नै बोल्छु
मन्को कुरा प्रष्ट सँग सबै सँग खोल्छु।
वृद्ध अशक्तको सेवा ठूलो धर्म ठान्छु
देश सेवा मेरो लागि ठूलो कर्म ठान्छु
ठालु भै खाने भन्दा श्रमिक ठूलो मान्छु
अत्तर भन्दा पसिनाको गन्ध मीठो मान्छु।
