“यो असारको महिना”

रमेशचन्द्र घिमिरे
भोर्लेटार, लमजुङ

पढ्छु, लेख्छु भन्ने कुरा मनभित्र नै रह्यो
यो असारको मैना त्यसै नपढेरै गयो

खन्नुपर्छ, जोत्नुपर्छ मौका छोप्नुपर्छ
नत्र फेरि ढिलो हुन्छ ऐल्यै रोप्नुपर्छ
बाबाआमा खेतमा जाने सधैँ यसो भन्दै
कहिले रोपाइँ सकिने हो बस्छु औँला गन्दै

घरमै बसी भाइबैनी हेर्नुपर्ने भयो
यो असारको मैना पाठ नपढेरै गयो

सरहरूले गृहकार्य दिनुभा’छ टन्न
धेरै पढ्नुपर्छ अझ म सिपालु बन्न
खेतमा गई असारको हिलो टेक्ने कैले
घरमै बसी कापीभरि पाठ लेख्ने कैले

पाठ नलेखेर पिट्ने सरलाई यौटा बिन्ती छ यो
यो असारको मैना पढ्न नपाएरै गयो ।