अनन्त कुमार बस्नेत
वर्षा शनै: पर भयो अब यो धरामा
देखिन्छ सुन्दर छटा वन कन्दरामा
चारै दिशा महक रौनक भव्य छायो
सङ्घारमा सुभग चाड तिहार आयो।
उद्यानमा मखमली ढकमक्क फुल्छन्
भृङ्गादि झन् मगन मस्त भएर डुल्छन्
मायाँ असाध्य जगमा नगले लगायो
सद्भावसाथ घरभित्र तिहार आयो।
मैदान फाँटतिर धान झुलेर बाला
देखिन्छ आज धरणी बहुतै निराला
उत्साह यो सुमनभित्र नयाँ जगायो
चेलीसँगै मृदुल पर्व तिहार आयो।
घुम्टो बिहान सब पर्वतले उघारे
दृश्यावली विपिन काननले निहारे
नौलो शरद् विनत भाव लिएर आयो
यो फूलको सुरभि पर्व तिहार आयो।
आकाशका सकल तारक जग्मगाए
हेरी अलौकिक कला दुनियाँ रमाए
यो देहको कलुष मैल सबै पखाल्यो
हाँसी मुसुक्क अब पर्व तिहार आयो।
सन्दृश्य छन् अति सुरम्य अकल्पनीय
आनन्दको पल छ दिव्य अवर्णनीय
यो जिन्दगी झलल दीपक झल्मलायो
भ्रातृत्वको रङ लिएर तिहार आयो।
खोलाघरे साहिलो देवीसमान आमा हुन् जन्मदायिनी हुन् माया दिई असाध्यै हुर्काउने उनी हुन् के त्याज्य…
रमेशचन्द्र घिमिरे भोर्लेटार, लमजुङ क-क-न-न भनेर मीठो बोल्न सिकाउँछिन् हात समाई बिस्तारै ताते-ताते गराउँछिन् मलाई…
नन्दलाल आचार्य "त्यो खिया लागेको ढोका बाहिर यमराज मुस्कुराइरहेको छ, बाबु, तिमी भित्रै बस !"…