ललिता ‘दोषी’
राष्ट्र हाँक्ने नेता आऊ
बनाऊ अब देश
हामी सबै एक भए
फेरिन्छ नि भेष
पढ्या लेख्या चाहिन्छ नि!
हाम्रो देशको नेता
फ्याँकौँ अब झारेझुरे
विचार गरौँ त्यता
अति भयो ङ्यार्रङुर्र
अति भयो पाप
अब उँधो झरे राष्ट्र
लाग्नेछ है श्राप
आफू मात्र भर्छन् पेट
पिउँदै सबको आँसु
राष्ट्रलाई सम्झेका छन्
तिनको बाउको नासो
हुँदैन है नेताज्यू हो
कात्रोभित्र गोजी
राष्ट्रघात गरे अब
पछार्नेछौँ खोजी
बढाउनु छ हात हाम्ले
कर्मठ नेतातिर
राम्रा नेता रोज्यौँ भने
हट्ने छ है पीर।
