“वसन्त”

गणेश आत्रेय
मदनपोखरा,तानपा-९,पाल्पा

वसन्त छर्दै जब चैत आयो।
पोथ्रा लता वृक्ष खुशी गरायो॥
हराभरा भो’ वन बाग बारी।
सफा भयो मौसम मेघ फारी॥

हाँसे फुले फूल झुले रमाई।
नाचे खुले रङ्ग चुनी सजाई॥
बास्ना छरी डुल्छ बतास धेर।
आनन्दको राज वसन्त हेर॥

मौरीसँगै भृङ्ग रमाउँदैछन्।
सङ्गीतमा गीत मिलाउँदैछन्॥
देखाउँदै नाट्यकला विचित्र।
हँसाउँछन् नृत्य गरी सचित्र॥

कुहूँ कुहूँ कोकिल गान गर्छे।
नाची जुरेली मनमख्ख पर्छे॥
ती गौँथली भव्य उडान गर्छन्।
पाखा पखेरा सब शान भर्छन्॥

यो चैत्र वैशाख वसन्त वेला।
जाडो र गर्मी नहुने झमेला॥
आनन्दमा छन् खग जन्तु सारा।
आराममा मस्त समस्त प्यारा॥