“सद्भाव बोकेर तिहार आयो”

विदुर अधिकारी
रामपुर,चितवन

छन्द-इन्द्रवज्रा

झर्ना धरामाझ सुसेल्न लागे
डाँफे चरी नाच्न भनेर जागे
बर्खा हटी पर्व सुरम्य छायो
सद्भाव बोकेर तिहार आयो

ती कोइलीले, मृदुकण्ठ पारी
झन् गाउँदा,रम्य बन्यो छहारी
सङ्गीतले भूमि अझै रमायो
सद्भाव बोकेर तिहार आयो

जाई, हजारी, करवीरलाई
टिप्दै लगे फूल समस्त आई
माला बुनेको, अति नै सुहायो
सद्भाव बोकेर तिहार आयो

बैनी टिको लाउन आउँदैछिन्
यो चाडको मर्म सुनाउँदैछिन्
भन्छिन् विहेको पल सल्बलायो
सद्भाव बोकेर तिहार आयो

यो पर्वको वर्णन गर्नलाई
को सक्छ होला भवमाझ आई
उद्भावले दिव्य गरा सजायो
सद्भाव बोकेर तिहार आयो।