“साधक मानव आज बनौँ”

घनश्याम रेग्मी

सार्थक जीवन पार सबै
उत्तम यो पल जाग सबै
गर्दछ कर्म भने असली
मिल्दछ मान तथा पदवी ।१

मोहन श्यामल भेष लिई
कृष्ण झरे कर वेणु लिई
कंस निभाउन जन्म यहाँ
सुन्दर पाठ सिकाउनमा ।२

जेल र नेल सहेर पनि
जन्मन सक्दछ दिव्य गुणी
बन्द हवस् कि त फाटक त्यो
मातुल दुश्मन भो जसको।३

नाम चले जब कर्म गरे
बुझ्न छ यो सब आज हरे
माधव शङ्ख बजाउन त्यो<
पाप घडा अब फुट्न रह्यो ।४

नीति बुझी यदि मानवले
चल्दैछ ईश्वर बन्छ अरे
देव हुने पनि मानव नै
दैंत्य हुने पनि मानव नै ।५

साधक मानव आज बनौँ
सत्य अँगाल्न छ शीघ्र गरौँ
भोक तृषा सब रोग जिती
सार्थक पार्न छ उच्च गति ।६