घनश्याम रेग्मी
घटी मेघ वर्षा खुलाकाश राम्रो
खुसीसाथमा भव्य होस् चाड हाम्रो
बगैंचा यिनै फूलमा मुस्कुराऊन्
शरद्का सुनौला बिहानी उदाऊन् ।।
जहाँ जन्मिए भूमि सो सम्झिएर
भए दूर आफ्ना फिरून् फर्किएर
नदी तालमा तोय सङ्ला सुहाऊन्
शरद्का सुनौला बिहानी उदाऊन् ।।
यहाँ पक्ष पुर्खाहरू सम्झिने छन्
यहाँ शङ्ख घन्टा मिठो बोल बोल्छन्
भवानी पुजी हर्षका धून आऊन्
शरद्का सुनौला बिहानी उदाऊन् ।।
सफा गेह भित्ता लिपी चट्ट माटो
पुरेनी भरी क्या खुसीको छ पाटो
उघारेर बाटो सफा छ्याङ्ग पारून्
शरद्का सुनौला बिहानी उदाऊन् ।।
बजून् शङ्ख घन्टा भवानी पुकारी
सबैको भलो भाव देखून् मुरारी
सबै जातका धर्मका चाड आऊन्
शरद्का सुनौला बिहानी उदाऊन् ।।
हिमाली पहाडी मधेसी मिलेका
नयाँ फूलबारी अहा! सिर्जिएका
खुसी शान्ति नेपालमा देख्न पाऊन्
शरद्का सुनौला बिहानी उदाऊन् ।।
रम्भा पौडेल प्यारा भाइबैनीहरु ! यो असार महिना हो । अब असार पन्ध्र आउनैलाग्यो ।…
तुलसीराम खरेल बिर्तामोड झापा नयाँ सरकारले आइतबार छुट्टी गराएको थियो। नयाँ शैक्षिक सत्रमा आइतबार विद्यालय…
घनश्याम रेग्मी नानीहरू चित्र बनाउँदै थिए धर्सा खिची रङ्ग लगाउँदै थिए उत्साहका हार्दिक रङ्ग घोलिए…
अम्बिका धिताल भक्तपुर "बुबा, योगले साँच्चै जीवन बदल्छ ?" छोराले बिहानको सुनौलो घाममा आँखा चिम्लिरहेका…