रचना शर्मा
“अब कसलाई बनाउने त जंगलको राजा ?” जनावरहरूमा खैलाबैला मच्चियो।
सिंहको अत्याचार र भ्रष्टाचारले सिमा नाघेपछि सबै वयस्क जनावरहरू मिलेर सिंहलाई सत्ताच्युत गराउने र रामधुलाई गर्ने निर्णयमा पुगे। यो खबर त्यस सिंहको नुन खाएकाहरूले सुटुक्क उसको कानसम्म पुर्याए। जंगलैभरीका जनावर एकजुट भएर आफू विरुद्ध षड्यन्त्र रचेको थाहा पाएर सिंहले सत्ताबाट राजिनामा दियो र फरार भयो।
“अब नयाँ जंगल बनाउनुपर्छ, भ्रष्टाचारको बीउले बनेका जंगलका रुखविरुवाहरू एक एक गरी सखाप पार्नुपर्छ !” – फ्याउरोले आदेश दियो। वयस्क बाँदर र मुसाहरू मिलेर भ्रष्टाचारमा सम्मिलित बाघ, भालु, चितुवा आदिका ओडार तहसनहस पारे। आवेसमा आएर जंगलका अति महत्त्वपूर्ण र मूल्यवान जडिबुटी,वृक्षहरू समेत भाँचभुँच पारेर जलाए। “हाम्रा नायकलाई पनि कैदबाट मुक्त गर्नुपर्छ !” अर्को ढाडे बनबिरालो करायो । स्याल, ब्वाँसा तथा छुचुन्द्राहरू थुनिएको खोरमा गएर बनबिरालोका समूहले तोडफोड गरे र थुनिएका जनावरहरूलाई भगाए।
“मियो विनाको दाइँ भयो हाम्रो जंगल। अब तुरुन्त लायकको अर्को राजा छान्नुपर्छ ।” गजराज गर्जिए। गजराजको गर्जन जंगलको एक कुनामा रहेको बन कुखुरोले सुन्यो। जनावरहरू भेला भएको ठाउँमा आयो र बास्दै बिन्ती चढायो,-“कुखुरी काँ
बासी भात खाँ
खोइ बासी भात ..?”
