मङ्सिर १०, २०८१ । दाङको घोराहीमा २९ औं राष्ट्रिय बालसाहित्य सम्मेलन सकेर हामी काठमाडौं फर्किसकेका छौँ । सम्मेलनअन्तर्गत र्याली, बालबालिकालाई कथा, कविता, निबन्ध, बालसमीक्षा, चित्रकला, सङ्गीत, अभिनय र नृत्यको प्रशिक्षण, विद्यार्थीका लागि देवनागरी लिपि अक्षर सुलेखन प्रतियोगिता, विद्यार्थीबिच बालकथा र बालकविता प्रतियोगिताको आयोजनासहित पुरस्कार वितरण, वरिष्ठ बालसाहित्य्कार तेजप्रकाश श्रेष्ठलाई “चूडा-चरण बालजीवनी पुरस्कार” समर्पण, बालसाहित्य, बालपठन, पुस्तकालयको महत्त्व, डिजिटल प्रविधिबाट बालबालिकामा परेको प्रतिकूल असर, स्थानीय सरकारबाट बालबालिकाका क्षेत्रसहित बालसाहित्य, बालपठन र बालपुस्तकालयका लागि भैरहेको लगानीसम्बन्धी विभिन्न ६ वटा परिसंवाद कार्यक्रम, बालपुस्तक प्रदर्शनी, बालबालिकाले चित्रकला प्रशिक्षणका अवसरमा तयार पारेका चित्रहरूको प्रदर्शनी, बालपुस्तकहरूको लोकार्पण लगायतका कार्यक्रमहरू संचालन भए । साथै नेपाल बालसाहित्य समाजका संस्थापक अध्यक्ष प्रा. डा. चूडामणि बन्धुलाई सार्वजनिक अभिनन्दन समेत गरियो । कार्यक्रमका अतिरिक्त बाहिरबाट पुगेका बालसाहित्यकार एवम् अन्य प्राज्ञिक व्यक्तिहरूलाई दाङका महत्त्वपूर्ण स्थलहरू रत्नदेव मठ र योगी नरहरिनाथद्वारा स्थापित पुस्तकालय, धातुबाट बनेको विश्वकै सबैभन्दा अग्लो त्रिशूल र पाण्डवेश्वर महादेव मन्दिर, बाह्रकुने ताल र कान्छा बराह मन्दिरको अवलोकन र अध्ययन गर्ने अवसर प्राप्त हुनुका साथै नेपाल संस्कृत विश्वविद्यालयको भ्रमण गर्ने मौका प्राप्त भयो । यी सबै कार्यक्रमहरूका अतिरिक्त सुविधाजनक आवास र स्वस्थकर-मिठो भोजनको व्यवस्थाका लागि स्थानीय आयोजक समितिका पदाधिकारी र सदस्यज्यूहरू, सबै सल्लाहकारज्यूहरू, संस्थागत सहयोग गर्नुहुने घोराही उपमहानगरपालिकालगायत सबै संघसंस्थाहरू, राष्ट्रिय वाणिज्य बैंक, कोपिला किताब विशेषगरी स्थानीय मूल आयोजक समितिका संयोजक डा. टीकाराम उदासी र सदस्य सचिव सूर्य बिसीप्रती नेपाल बालसाहित्य समाजको अध्यक्षको हैसियतले हार्दिक कृतज्ञता व्यक्त गर्दछु । साथै, विभिन्न प्रशिक्षणका प्रशिक्षक एवम् सहजीकरण गर्नुहुने, परिसंवादमा आफ्ना गहकिला विचार प्रस्तुत गर्नुहुने र सम्मेलनमा सहभागी हुनुहुने सबै विशिष्ट साहित्यकार लगायत सहभागी विद्यार्थी भाइबहिनीहरू, शिक्षक एवम् प्राध्यापकहरू, सामाजिक अभियन्ताहरू, पत्रकारहरू, स्थानीय निकायका पदाधिकारीहरू सबैमा हार्दिक आभार । सम्मेलनको समुद्घाटन गरिदिनुहुने उद्घाटन समारोहका प्रमुख अतिथि नेपाल संस्कृत विश्वविद्यालयका उपकुलपति प्रा.डा. भीम खतिवडाज्यू र समापन समारोहका प्रमुख अतिथि वरिष्ठ पत्रकार नारायणप्रसाद शर्माज्यूमा हार्दिक आभार । यी सबै कार्यक्रमको व्यवस्था र समन्वयका लागि रातदिन खट्ने समाजका महासचिव विजयराज आचार्यलाई पनि म हृदयत: साधुवाद दिन्छु ।