युगल बसेल
सन्धिखर्क -१,तुम्कोसट हाल चन्द्रागिरी -११
नरोऊ नरोऊ भन्देऊ न उँSSउँ गर्दै रुनेलाई
बोSSSडी ! भनी तर्साइदेऊ न भाउ धेरै हुनेलाई।
काखैमा बसाल्ने रे आँखैमा पसाल्ने रे
कोक्रोमा, बिछ्यौनामा राखे रोइहाल्ने रे।
साना साना आँखामा सपना ठूला होलान् कि ?
फुलजत्रा पाउले अग्ला चुली छोलान् कि ?
सोध सानो मुटुमा माया कति ठूलो छ ?
माया नाप्ने पाथी छ आथवा के तुलो छ ?
त्यो कलिलो चिउँडोमा हाँसो फुल्ने कहिले?
साना साना ओठमा बोली फुट्ने कहिले ?
टुकुर टुकुर हिँड्ने बेला मैले तिनलाई डोर्याऊँला
सोधिदेऊ न म डोरिने दिन पो कहिले आउला
