रमेशचन्द्र घिमिरे
भोर्लेटार, लमजुङ
उरुङ बनाई पातको
मर्याकमुरुक मिचेर
आँख्ला डाँठ निकाली
सिलौटामा थिचेर
हत्केलामा फिँजाई
सुत्ने बेला रातमा
तिउरी लाइदिन् आमाले
दाहिने हातमा
रातो पार्न मेरो हात
बज्यैसित सोधेर
तिउरीसँगै पिनिछन्
मकरकाँची खोजेर
मुड्की पार्दै घुसार्दै
कर्कलाको पातमा
तिउरी लाइदिन् आमाले
देउरे हातमा
झुम्रो कस्दा मुठीमा
ला छेकियो
हेर्दाहेर्दै आफ्नै हात
भकुन्डोझैँ देखियो
नमिल्ने भो कोट्याउन
सिन्का हाली दाँतमा
तिउरी लाइदिन् आमाले
दुइटै हातमा।
