आवेगको परिणाम

दुर्गा वनवासी

एउटी गरिव, विधवा आमाले एकपटक आफ्ना छोराछोरीहरुका लागि एउटा मात्र गुडिया किनिदिएर मिलेर खेल्न भनिन् । आमा काममा गएपछि तिनीहरु त्यो खेलौनासँग खेल्न तयार भए तर छिट्टै नै लुछाचुँडी सुरु भयो।
तानातान र खोसखोसमा तिनका साथीहरुले पनि आ-आफ्ना साथीलाई साथ दिए । परिणामत: गुडियाको एउटा आँखा एउटाको हातमा आयो, एउटा कान अर्कोले लग्यो। पुच्छर चुँडिएर एउटाको हातमा परयो, खुट्टाहरु पनि अलग अलग हातमा परे । भुवा छरिएर भूईँभरि । हेर्दाहेर्दै खेलौना त कुरूप ,विभत्स र अस्तित्वहीन भयो।
आवेगमा आएर गरेको झगडाले त्यति राम्रो गुडिया नस्ट भएको देखेर तिनीहरु अत्यन्तै दुखी भए। उदास आँखाहरुले त्यो विरूप गुडियालाई हेरेर टोलाउन थाले तर निक्कै ढिलो भइसकेको थियो।