“जाऔँ ज्ञानको मन्दिर“

शोभा काफ्ले खतिवडा

ज्ञान सिक्न ज्ञानको मन्दिर जानु पर्छ साथी !
मायॉ गर्ने गुरु सबै बा,आमा जस्तै छन जाती !
ज्ञानी हुन,विद्वान हुन,असल मानिस पनि बन्न !
धेरै पढौँ,गरी खान र परिवार राम्रोसित पाल्न !

ठूला दाजु दिदी धेरै जाती र असल हुनु हुन्छ !
शिक्षक,शिक्षिका सबैले ज्ञान सिकाउनु हुन्छ !
पुस्तकमा लेखिएका कुरामा ज्ञान धेरै नै हुन्छ !
इमान्दार भै पढ्ने मानिस वैज्ञानिक नि हुन्छ !

स्कुलमा सबैसित खुबै मिलेर हामीले बस्नु पर्छ
झै झगडा गरी दुःख दिने बानी अब छाड्नु पर्छ
नजानेको र नबुझेको कुराहरु गुरुलाई सोधौँ
नेपाली र अङ्ग्रेजी अनि हिसाब,विज्ञान पढौँ!

पढी ,लेखी ,ज्ञानी बनी नाम कमाउनु पनि पर्छ !
आफ्नो देशको नाम राखी विश्व डुल्नु पनि पर्छ
खेलकुद ,ज्ञान,ध्यान,नाचगान गर्न अघी बढेर !
घरको काम पनि सिक्नु पर्छ स्वाभिमानी बनेर

गाऊँ,टोल छिमेकसित मिली जुली हामी बसौँ
विज्ञानकोपाटो चलाई ज्ञानका कुरा धेरै सिकौँ
अल्छी बानी कहिल्यै पनि गर्नु हुन्न है त साथी !
असल बनेर अन्तरिक्ष पनि चुम्न पुगिन्छ माथि !