सृजना घिमिरे ढकाल
“म” को हुँ, तिमीलाई कसरी थाहा हुन्छ?
म त म हूँ, आफ्नो मनको चाहना हूँ।
तिमी अनुसारको म तिम्रो सोच,
मलाई चिन्ने तिम्रो आधार हो।
तर तिमीले चिनेको म, म होइन,
यो त तिम्रो म प्रतिको धारणा हो।
तिम्रो सोच तिम्रो पहिचान हो,
अनि मेरो पहिचान म आफैं हूँ,
मैले म प्रति बनाएको धारणा हो।
कहिलेकाहीँ त मैले आफैँलाई चिन्दिनँ,
शून्यतामा पुगेर फर्किएको बटुवा जस्तै।
अनि आफ्नै विचार र धारणाले
आफ्नो निर्माण गर्छु।
आफूलाई के हुँदा सन्तुष्टि मिल्छ,
आफूलाई त्यसमै ढाल्छु।
सबैमा आत्मीयता र आफ्नोपन बाड्छु।
म जो हूँ, तिमीलाई कसरी थाहा हुन्छ,
र भन्छौ— “तिमी यस्तो र त्यस्तो!”
म त आफ्नै मनको चाहना हूँ।
म प्रतिको तिम्रो धारणा
तिम्रो परिचय हो।
अनि मेरो परिचय
म प्रतिको मेरो धारणा हो।
म त आफ्नै मनको चाहना हूँ।
मैले म प्रति बनाएको धारणा हूँ।
