“दशैँ”

लक्ष्मी रेग्मी
उर्लाबारी

आफ्नो दशैँ पर्व हर्षोल्लासले,
घरघर भित्रै रमाइलो छायो।
मालश्री धुनले मिठासै भन्यो,
आनन्दले मन सुवासै ल्यायो।।

टीका जमरा अनि लालअक्षता,
आशीष बोकेर बुबाआमाबाट।
दाजुभाइ र दिदीबहिनीसँग,
मायाको धारा बग्छ एउटै साथ।।

पिङ खेलेर आकाश छुन परे,
बालक–बालिका हाँस्दै रमाउँछन्।
घोडाजस्तो डुल्ने स–साना टोल,
गीत गाएर गाउँभरी घुम्छन्।।

हातेमालोले जोडिन्छ मनको,
सम्बन्ध अटुट गाँठो बन्छन् सबै।
दशैँले दिने यो सन्देश सुन्नु,
एकता–मायाले जीवन सजौँ।।