घनश्याम रेग्मी
नेपाल मेरो छ धरा पवित्र
हिमालको सुन्दर दृश्य चित्र
पहाड मेरो सुनको धुरी हो
बेंसी तथा फाँट हरा चुरी हो ।।
खम्बा बनी शैल जहाँ खडा छन्
पानी दिने हार्दिक ती घडा हुन्
>चियाउँदै दक्षिण भेगलाई
गर्छन इसारा स्मित भाव ल्याई ।।
पहाडको भाव मितेरी गाँस्ने
चुरे तथा भावरसाथ हाँस्ने
पोसाक छन् झल्लर पातयुक्त
नेपालका हुन् गहना प्रयुक्त।।
उब्जाउ छन् फाँट मधेस मेरा
परिश्रमी मानिसका बसेरा
अनेक छन् फाँट यहाँ भकारी
घुम्छन जहाँ कर्म गरेर मौरी ।।
थुम्काहरू फूल थुँगा समान
मुहारका बिन्दु अहा! निशान
खोला नदी पर्वत जोड्न पाऊँ
म हाँस्न पाऊँ मुलुकै हँसाऊँ ।।
झन्डा उचा पर्वतझैँ उठाऊँ
यो देशको उन्नति देख्न पाऊँ
मिलेर यो राष्ट्रिय गीत गाऊँ
“नेपाल मेरो जय” गान गाऊँ ।।
