“असारको मर्म”

भगवती शर्मा

लाग्यो असार महिना अब आजदेखि
गर्मी हटेर सुरु हुन्छ झरी विहारी
उठ्छन् सुतेर रहने बिरुवा अनेक
फुल्छन् गुलाफ पनि कञ्चन एक एक।

कीरा चरा र पशुले पनि फेर्छ बोली
नाँचेर गाउँछ त्यहाँ मृदुबात खोली
खोलो नदी सरहको बहुतै करायो
गर्जिन्छ बादल घुमी नगरा बजायो।

धर्ती बनिन् नववधू रङरूप घोली
सारी धरेर हरियो हरियै छ चोली
फुस्रो धुलो मयल छैन शरीर चङ्गा
हुन्छिन् अचम्म सँगकी सुकिली र दङ्ग।

सुख्खा मुहान पनि मूल फुटेर आए
आफ्ना जहान परबाट जुटेर आए
पाक्छन् सबेर घरमा परिकार खाजा
नारेर गोरु बलिया कृषिमा रमाए।

हाँस्छन् किसान जब त्यो दुखकष्ट बिर्सी
यस्तो असार कसले गरिदिन्छ सृष्टि
आएन यो यदि असार भने रहदैन खेला
रोएर बस्छ कृषि कर्म गरिँदैछ हेला।