“दसैँको गृहकार्य”

रमेशचन्द्र घिमिरे
भोर्लेटार, लमजुङ

रमाएर यो दसैँ मान्न पाइन्न कि ?
गृहकार्य धेरै छ गर्न भ्याइन्न कि ?
नपढेर बिदामा खेल्यौ भने खेल
अर्को जाँचमा पक्कै नि हुन्छौ तिमी फेल´
सर् मिसका कुराले दिमाग तात्तिन्छ
लेख्दा-लेख्दा थाकेर मनै आत्तिन्छ
छिमेकको साथीले चङ्गा उडायो
थोत्रो जर्किन काटेर मोटर गुडायो
त्यो साथीले खेलेको देखेपछि झन्
मलाई कत्ति लेख्न र पढ्न छैन मन
पढ्नु पर्छ भन्ने कुरा हाम्लाई थाहा छ
चाडको बेला पढ्नै पर्छ भन्ने काहाँ छ ?
किन यस्तो हैरानी किन पेलम् पेल ?
घुँडा मारी लेखूँ म अब कतिन्जेल ?
पिङ् खेल्न´नि पाइएन मनै खन्न छ
सकिएन लेखेर अझै टन्न छ
सर् मिसले यो कुरा मनमा लिनू है !
रमाउने र हाँस्ने-खेल्ने मौका दिनू है !
पढाइको हतारोले टीकै लाइन्न कि ?
गृहकार्य धेरै छ गर्न भ्याइन्न कि ?