“यस्तै छ संसार”

अनन्तकुमार बस्नेत

कोही भिखारी र दरिद्र हुन्छ
कोही यहाँ दौलतदार हुन्छ
कतै छ उल्लास कतै विषाद
छ चन्द्रमामा पनि काल दाग ।

जो मोहको चक्कर भित्र फस्छ
र लोभको सागर भित्र पस्छ
माणिक्य मोती जति नै थुपारौँ
थपिन्छ पीडा उति नै हजारौँ ।

जो गर्छ दैनन्दिन जालझेल
तथा सयौँ कुत्सित नीच खेल
ऊ शान्त देखिन्न अशान्त हुन्छ
आफैँ जली राख समान हुन्छ ।

सन्मार्ग बिर्सेर कुमार्ग चल्ने
बोकेर ईर्ष्या मन भित्र जल्ने
जो चित्तमा राख्छ सदैव अर्थ
हुँदैन राम्रो उसको किमार्थ ।

खुसी कतै हुन्छ कतै विराग
बल्छन् कतै दीप कतै चिराग
होस् सभ्य राम्रो व्यबहार बोली
छ आज यो जीवन हुन्न भोली ।

न योजना हुन्छ न ता तयारी
चल्दोछ यो अन्तिमको सवारी
गयो भने जीवन झुल्किँदैन
यस्ता पहेली किन सुल्झिँदैन ?