इन्जिनियर

प्रेम पुन मगर

“तिमी भित्र नजाउ, यता बस।” प्रेमनारायण पण्डितले छोरो उमेशसँग आएका बिर्खबहादुरलाई बाहिर पिडीमा चकटी दिँदै भने।
उमेशले सरासर पण्डितको पुजा कोठामा गएर बत्ति जडान गरिदिए।
उनीहरूलाई बिदा गरेपछि उनका तीन कक्षामा पढ्ने नातिले सोध्यो- “हजुरबुबा त्यो उमेश दादाको बुवालाई किन भित्र पस्न दिनुभएन।”
“त्यो सानो जातको हाम्रो घरमा पसेपछि धर्म नासिन्छ नि बाबू।”
उनको जवाफमा नातिले अर्को प्रश्न गर्यो – ” उनीहरू त बाउ छोरा हुन्। उमेश पस्दा नासिन्न र हजुरबुबा ?”
पण्डित लाज पचाउदै बोले।
“ऊ त इन्जिनियर हो नि बाबु।”