के मोबाइल विना विद्यार्थी जीवन असम्भव र अकल्पनीय छ

नेपालमा केही वर्ष यता सञ्चारको तीव्र रूपमा विकास तथा विस्तार भएको पाइन्छ । करिब ५ वर्ष यता मोबाइलको प्रयोग दिनप्रतिदिन बढ्दै गईरहेको अवस्था छ । अहिले हरेक बालबालिकाहरूदेखि लिएर किशोर किशोरी, युवा, वयस्क, वृद्धवृद्धाहरूले मोबाइल फोनको प्रयोग गरिरहेका हुन्छन् ।
साथसाथै विद्यार्थी, किसान, मजदुर श्रमिक, कर्मचारी, शिक्षक, बुद्दीजिवी, व्यापारी र सर्वसाधारण जनता सबैको हात हातमा मोबाइल फोन हुने गरेको पाइन्छ ।
मोबाइलमा अडियो तथा भिडियोदेखि लिएर चलचित्र, अलार्म, भ्वाईस रेकर्ड, इन्टरनेटको प्रयोग गरी संसारभरका नयाँ नयाँ घटना तथा गतिविधिहरू हेर्न तथा थाहा पाउन सकिन्छ । विश्वका नयाँ नयाँ गतिविधि र घटना अनि आफ्ना आफन्तजन, इष्टमित्र, साथीभाई, मान्यजन र गुरु वर्ग आदि सबैका क्रियाकलाप र गतिविधि बारे जानकारी पनि मोबाइल फोनबाट नै पाउन सकिन्छ ।
मोबाइल फोन एउटा यस्तो साधन हो, जुन साधनको सहि सदुपयोग गर्न जानियो भने जीवनमा सकारात्मक परिवर्तन ल्याउन सकिन्छ । आफूभन्दा टाढा रहेका आफन्तजन, इष्टमित्र तथा साथीभाईहरूसँग कुराकानी गर्न, सम्झन र घण्टौँ लाग्ने काम मिनेटमै सम्पन्न गर्न, गराउन र विभिन्न कुराको जानकारी थाहा पाउन मोबाइल फोनको प्रयोग गरिन्छ । मोबाइल फोनको प्रयोग अडियो सुन्न वा भिडियो हेर्नका लागि होस् या फेसनकै लागि होस् प्रत्येक विद्यार्थी र अभिभावकसँग अहिले साथमा मोबाइल फोन हुने नै गर्दछ ।
मोबाइल फोन अहिले फेसन भईसकेको छ । सहि सदुपयोग गर्न जानियो भने यसले जिन्दगी बनाउन सहयोग पु¥याउदछ भने यसको गलत प्रयोगले जिन्दगी नै बर्वाद गर्दछ । मोबाइल फोनको गलत प्रयोग अर्थात् दुरुपयोग प्रायः गरि विद्यार्थीहरूबाट नै हुने गरेको पाइन्छ । मोबाइल फोनको गलत प्रयोग अधिकांश सहरी तथा विकसित ठाउँ, सदरमुकाम र इन्टरनेटको पहुँच भएको ठाउँमा रहेका विद्यार्थीहरूले गरेको कुरा बेलाबेलामा हामीले सुन्न सकिन्छ । मोबाइल फोनको कारण कति विद्यार्थीहरू अरूको नक्कल गर्दा कुलतमा लाग्ने, माया प्रेमको जालमा फसेर आफ्नो पढाइ र आमा बाबुको सपना र चाहानालाई भुलि दिने गर्दछन् । फेसन, स्टाइलको लहलहैमा लागेर अधिकांश विद्यार्थीहरूको ध्यान अहिले पढाईमा देखिदैन । उनीहरूले आफ्नो लक्ष्य र भविष्य के हो भन्ने कुरा समेत बिर्सिसकेको अवस्था छ ।

के मोबाइल फोन विना विद्यार्थी जीवन असम्भव र अकल्पनीय छ ?
विद्यार्थीहरू एक पटक यो कुरालाई अवश्य ध्यान दिउँ । के अहिले विद्यार्थी जीवनमा मोबाइल फोन, आईप्याड, गेम आफ्नो पढाई र भविष्यभन्दा पनि महत्वपूर्ण छ र ? आफ्नो र आमाबाबुको इच्छा, चाहना र आवश्यकता भन्दा पनि मोबाइल नै त्यस्तो महत्वपूर्ण चीज हो र ? मोबाइल फोनको अत्यधिक प्रयोगले तपाईको उज्ज्वल र सुन्दर भविष्यमाथि खेलबाड गरिरहेको छ भन्ने कुरामा बेलैमा हेक्का राख्ने कि नराख्ने ?
एक पटक अवश्य सचेत होऔँ मोबाइल फोनदेखि ! यसको सहि सदुपयोग गर्न सकेमा विद्यार्थीहरूले घरबाटै पनि आफ्ना कक्षाका साथीहरू तथा कक्षा शिक्षकसँग नजानेका र नबुझेका विषयवस्तुहरूको बारेमा छलफल, सल्लाह, सुझाव र परामर्श लिन सकिन्छ । त्यस्तै, इन्टरनेटबाट नयाँ नयाँ र खोजमूलक जानकारी, तथा ज्ञान लिन सकिन्छ । विश्वमा दिनदिनै नयाँ नयाँ आविष्कार, अनौठा र चाखलाग्दा विषय, आश्चर्यजनक अनि रोचक घटनाहरू घटिरहेका हुन्छन् ति सबैको ज्ञान र जानकारी मोबाइल फोनबाट नै सहज रूपले हासिल गर्न सकिन्छ ।
टाढा टाढाका मान्छेलाई फेसबुकमा साथी बनाई कुरा गर्नु, अनावश्यक चर्चा चलाउनु, सानै र पढ्ने उमेरमै माया प्रेमको जालमा फस्नु, कुलतमा लाग्नु र पढाई प्रति ध्यान नजानुको मुख्य कारण अहिले मोबाइल फोन नै भएको छ । अहिले भर्खरै भेटेको र सामाजिक सञ्जालमा फोटो हेरेकै भरमा किशोर किशोरीहरू एकले अर्कोलाई मन पराउँछन्, नाम तथा मोबाइल फोन नम्बर साटासाट गर्छन् अनि साँझ पढ्ने समयमा फोनमा अनावश्यक गफ गरेर पढाई बर्वाद गरिरहेका हुन्छन् ।

मोबाइल फोनको सही सदुपयोग गरौँ
वास्तवमा मोबाइल फोन तथा सामाजिक सञ्जाल जस्तै फेसबुक, ट्विटर, जिमेल, गुगल, युट्युब, टिकटक आदिलाई विद्यार्थीहरूले फेसन, स्टायल र आवश्यकताका रूपमा लिनाले यसको गलत प्रयोग गरिरहेको देखिन्छ । तर, सहि समयमा सहि उपयोग गर्न सक्ने विद्यार्थीहरूका लागि भने मोबाइल एउटा वरदान साबित भएको छ । मोबाइल फोनमा समय बिताउने यस्ता विभिन्न सामाजिक सञ्जाल मात्रै नभई विद्यार्थीका लागि आवश्यक पर्ने विभिन्न उपयोगी कुराहरू पनि रहेको पाइन्छ ।
जस्तै, हिसाब किताब गर्नको लागि क्यालकुलेटर र समय रहेको हुन्छ, विभिन्न देशको नक्सा हेर्न र खोज तथा अनुसन्धान गर्न गुगलको प्रयोग गर्न सकिन्छ । विज्ञानका आविष्कारका बारेमा जानकारी लिन, आफूले पाठ्य वस्तुमा नबुझेका कुराहरू गुगलमा सर्च गरेर हेर्न र बुझन यसले विद्यार्थीहरूलाई निकै सहज बनाउँछ । यति उपयोगी साधन हुँदाहुँदै पनि विद्यार्थीहरूले विभिन्न गेम खेलेर, अनावश्यक कुराकानी गरेर, भिडियो हेरेर यसको दुरुपयोग गरी समय बिताईरहेका हुन्छन ।
खास गरी मोबाइल फोनमा झुन्डिरहने र यसको दुरुपयोग तथा गलत प्रयोग गर्नेमा विद्यार्थीहरू नै अगाडि देखिन्छ । यो विषय अहिले गम्भीर बनेको छ । यसको बेलैमा विद्यार्थी लगायत शिक्षक, अभिभावक तथा सम्बन्धित निकायले ध्यान पुर्याउन जरुरी देखिन्छ ।

श्रोतःhttps://khabareducation.com