क्षमता

सीता रेग्मी
“सुन्दरहरैँचा, मोरङ

“डाक्टर अङ्कल मेरो आँखामा के भएको छ ?” कक्षा ७ मा अध्ययनरत सान्याले सोधिन्।
“खासै केही भएको छैन नानी, एउटा आँखामा थोरै दृष्टी कम भएको हो, चस्मा लगाउनुपर्छ। ठिक हुन्छ।” डाक्टरसाबले उत्तर दिनुभयो।
“ला! हो ? अब एउटा आँखामा मात्र चस्मा कसरी लाउने त ?” नानी चिन्तित भईन्।
“चस्मा दुबै आँखामा लाउने हो , पावर चाहिँ कमजोर आँखामा मात्र हुन्छ!” डाक्टरले हाँस्दै भने।
“तर डाक्टर अङ्कल मैले कहिलै पनि एउटा आँखाले मात्र हेरेको छैन त ! सधैँ दुबै आँखाले बराबरी हेर्छु अनि एउटा आँखा मात्र कसरी कमजोर हुन्छ होला ?” नानीको चिन्ता अझ बढ्यो।
“तिमीले दुबै आँखा बराबर हेरे पनि यी आँखामा रहेको हेर्ने क्षमता फरक-फरक हुन्छ। जसरी एउटै कक्षाका विद्यार्थीहरु पढाईमा कोही उत्कृष्ट हुन्छन्, कोही मध्यम र कोही निम्न अनि शिक्षकहरुले निम्न पढाई भएकालाई बढी ध्यान दिएर अतिरिक्त समय पढाएर बराबर बनाउने कोशिस गर्नुहुन्छ नि, यो चस्मा पनि हामीले गरेको एउटा त्यस्तै कोशिस हो नानी।”