“निर्णय”

लता के सी
तीनकुने , काठमाडौं

समाज बटुलेर बाजेले समस्या तेर्स्याए , “आफूखुसी गरेर कुजातसंग भाग्ने दलेकी छोरी कमलीलाई के सजाय गर्ने ? ”
पढेलेखेका बुज्रुगहरूले कमलीको उमेर र स्वतन्त्रताको विषय उठान गरे । समयले फड्को मारेको वर्तमान अवस्थामा जातीय भेदभावको प्रश्न उठाउनु जायज छैन भनेर सुझाव पनि दिए ।केही नवयुवकहरूले विद्वानहरूका विचारको कदर गर्दै भने , ” यसलाई सामाजिक समस्याको रूपमा लिएर झमेला नगरौँ ।”

समाजका पण्डित भनाउँदाहरू कुर्लिए , “बाजेको नुन खाएर हुर्किएकी कमलीले बाजेको नाक काटेकी छे । यसलाई गाउँमा बस्न दिनु हुँदैन । सम्बन्ध विच्छेद गराउनु पर्छ । ”
कमलीलाई अधिकांशले गालीगलौज गर्न थाले । उसका जोईपोइ चूपचाप लागेर बसेका थिए । ऊ भने मनमनै सोच्दै थिई , ” बिहे त हामी दुबैले गरेका हौँ तर म नारीमाथि मात्र किन आक्षेप थोपरेको होला ? ”
सबैका कुरा सुनेपछि बाजेले उनीहरूलाई सामाजिक बहिष्कार गर्ने निर्णय सुनाउन के लाग्दै थिए , हठात् बाजेकी छोरी बोलिन् , ” कमली दिदीको देवरसंग म पनि बिहे गर्दै छु , बुबा ! त्यसबेला हजुर मलाई के गर्नु हुनेछ ?”
बाजे खङ्ग्रङ्ग भए तर छिटै सम्भालिएर भने , ” ल गाउँबासीहरू, दुई छोरीहरूको बिहे धूमधामले गर्ने तयारीमा हामी सबै जुटौँ ।”