सम्झौता

सुस्मिता अधिकारी
काठमाडौँ

बिरालोले आक्रमण गरिहाल्छ कि भनेर डराउने मुसा एक्कासी मुस्कुराउन थाल्यो।
आँट गरेर बिरालो सामु गएर भन्यो ,” अरु जनावरले ठूलो शिकार गरेर कैयौं दिनको आहारा जोहो गर्छन् ,तिम्रो साहस म जस्तो सानो निरिह मुसा समाउने त हो नि !”
ढुकेर बसेको बिरालोले वरिपरि हेर्दै मुसाको पछाडि ठूलै समुह छन् कि भनेर झ्याप्प समाउँने आँट नगरी टक्क अडियो।
मुसा खुर्र दौडेर दुलोमा पस्यो।
घर मालिक ,”यसलाई दुध भात खुवाएर पालेर के काम त्यत्ति मुसा मार्न पनि सकेन “।
मालिक ओझेल पर्ने बित्तिकै मुसाले बिरालो सामु सुनौलो प्रस्ताव राख्यो,”हामी मिलेर लुकामारी खेलौँ । तिमीले स्याबासी पाउछौ र हामीले अन्न !”
बिरालो ,”तिमी पहिला नियमन निकायका ठूलै पदमा त थिएनौ ?”